üs fingsch übrigens ou uf Facebook und Instagram:


15.09.2018

Geburtstagsständli

Hüt isch de Hansueli 70gi worde. 

 

Für sini Dienste woner i de letschte Johr geng wieder für üs gleischtet heimer ihm weue e Fröid mache und goh MERCI säge.

 

Mir wünsche ihm für die sini witere Läbesjohr aues Gueti und föie üs, dasmer mau öpis hei chönne zrugg gäh. 

 

DANKE Hansueli!



06.09.2018

Guggestamm

D Summerpouse isch scho gli passé und mit ihre ou d Guggestämm.

 

Mitti Oktober föhmer wieder afoh Stückprobe für die kommendi Fasnacht. Und wie chönnts ou angers si? Mir si scho vouer Vorfröid uf die nächste Uftritte!

 

Dasmau simer im El Mosquito eis goh näh. Proscht und bis zum nächste Mau!



25.08.2018

Hochzit

De Ädu unds Fränzi heisech hüt ir Chile in Neftenbach s JA-Wort gäh.

 

D Schlossgeischter si natürlech ou agreist und si ihne Spalier gstange.

 

Mir wünsche ihne für ihri gmeinsami Zuekunft aues Gueti und hoffe, dasmerse wieder einisch bi üs ir Gägend aträffe.



24.08.2018

Neuzuezüger Begrüessig

Härzlech Willkomme nöii Ihwohner vo Thunstette und Bützbärg!

 

Wie ouscho im vordere Johr heimer üse Verein ar jährleche Neuzuezügerfiir dörfe goh vorsteue.

 

Zerscht heimer vorder Chile z Thunstette es paar Stück gspiut und aschliessend isch s Programm im Schloss witergange.

 

Danke am Gmeinrot fürd Iladig und das feine Apéro. Mir chömme gärn wieder!



07.07.2018

E Nacht uf der Hohwacht

Üses langjährige Mitglied, de Schäfi, het zu sim Geburtstagsfescht uf der Hohwacht iglade. 

Mir si natürlech gad mit de Instrumänt agreist und hei es paar Stück zum Beschte gäh.

 

Aber lueg doch gad säuber:



08.06.2018

Geischterstamm Juni 18

Immer am erste Donnsti vom Monet füehre mir

e Guggestamm düre. 

 

Das Mau simer z Langethe im Hard gsi go Bogeschiesse.

Ou wenns am Afang chli e Herusforderig isch gsi,

hei aui sehr viu Spass gha. 

 



26.02.2018

Fasnacht 2018

D Fasnacht isch mitlerwile schowieder verbi und mir chöi ufnes glungnigs Johr zrugg luege.

 

Mit Uftritte ar Fasnacht z Thun, ar Guggenight z Aarwange und em Pflotschibau z Langethe simer scho vor der Fasnacht z Langethe ungerwägs gsi. Näbst de Uftritte am Umzug z Roggu und am Chinderumzug z Langethe, heimer s erste Mau ou am Gönnerobe und am Guggespektaku dörfe spile. Das isch für üs es riisiges Highlight gsi! De Abschluss heimer mit der Fasnacht z Huttwil gmacht.

 

Mir fröienis scho jetz uf die nächsti Fasnacht!



25.10.2017

Bitritt id LFG

Uf üses Jubiläumsjohr 2018 si mir offiziell Mitglied vor Langenthaler Fasnachtsgesellschaft - LFG.

 

Wetsch wüsse wär süsch no aues derbi isch?

Push The Button!



02.10.2017

Jubiläum

D Vorbereitige für d Fasnacht 2018 loufe uf Hochtuure. 

 

Mir dörfe die Fasnacht üses 20-jährige Jubiläum fiire! Und mir fröie üs dasmer für das bsungere Johr es paar ehemaligi Mitglieder hei chönne zrugggwünne wieder bi üs mitzspile.